Vrydag 2 Desember 2022

Johannes 3:19-21
19En so kom die skeiding: die lig het na die wêreld toe gekom, en tog het die mense eerder die duisternis as die lig liefgehad, want hulle dade was sleg. 20Elkeen wat kwaad doen, haat immers die lig en kom nie na die lig toe nie, sodat sy dade nie aan die kaak gestel moet word nie. 21Maar wie volgens die waarheid handel, kom na die lig toe, sodat dit duidelik kan blyk dat sy dade in gehoorsaamheid aan God gedoen is.”

Om oor te gesels of te dink:

• Nikodemus kom in die nag, in die donker na Jesus. Hy kom om vir Jesus te vra, hoe kan ‘n mens begin leef soos iemand wat werklik glo? Jesus se antwoord is baie eenvoudig.
• As jy nie glo nie, wys dit. Jy vra nie te veel vrae nie. Jy ondersoek nie te veel nie, want dan kry mens antwoorde. Jy wil nie die werklikheid sien nie, want dit is nie altyd lekker om met alles gekonfronteer te word nie. Dit is die lewe in die donker. Dit is gerieflik, maklik en lekker. Jy hoef nie te weet of te sien hoe ver weg jy van God se reinheid, liefde en lig is nie.
• Is daar aspekte in jou lewe wat steeds in die donker is? Wat jy nie eerder met die waarheid gekonfronteer wil word nie? Is daar dinge, situasies en geleenthede wat jy nie met ander (of met God) deel nie, want jy weet dit is nie iets wat by iemand wat in die lig leef, pas nie? Wat in jou lewe, gee jy nie aan aandag nie? Wat in jou lewe, bring jy nie na vore nie? Wat is steeds in die duisternis? Is daar enige iets wat in jou lewe wat jy kies om in die duister te hou, want jy wil nie werklik dit opgee nie? Deel jou hart en jou lewe met die Here.
• Indien dit nodig is, bely dit aan ‘n mede-gelowige wat saam met jou kan bid en jou verantwoordelik kan hou om dit te los en in die lig te kan begin leef.

Gebed:
Here van my lewe,
Ek besef daar mag steeds dinge in my lewe wees wat ek kies om in die duister te doen. Ek besef dat die eie ek steeds sterk my lewe WIL lei. Here, help my om in die lig in te tree. Om voor U te staan met al my wonde, tekortkominge en foute. Here help my, deur dit gesond te maak, vir my lief te wees en my te transformeer. Here, ek wil so graag in die lig wees, al is dit soms ook ongemaklik.
Amen.