2 Kronieke 7:1-3 (2020 Vertaling)
1Net toe Salomo klaar gebid het, het vuur uit die hemel neergedaal en die brandoffer en maaltydoffers verteer, en die heerlikheid van die Here het die tempel gevul. 2Die priesters kon nie die huis van die Here binnegaan nie, want die heerlikheid van die Here het die huis van die Here gevul. 3Al die Israeliete het gesien hoe die vuur en die heerlikheid van die Here op die tempel neerdaal. Hulle het met hulle gesigte na die grond gekniel op die plaveisel, en in aanbidding gebuig. Hulle het die Here geprys met: “Want Hy is goed; ja, vir ewig duur sy troue liefde.”

VRAE:

• In vandag se gedeelte sien ons hoe ‘n hele volk voor God se aangesig buig, omdat hulle God se teenwoordigheid beleef in Sy tempel. Salomo het die tempel gebou om vir God ‘n woning te bied onder God se mense. Hierdie “huis” van die Here, was veel meer vir die mense van Israel, as wat dit vir God was. God was nog altyd saam met sy mense teenwoordig. Die mense het egter nie altyd God se teenwoordigheid gevoel nie. Nou kry die mense ‘n geleentheid om die teenwoordigheid van die Here te kan sien, beleef en altyd daarop staat maak.
• Is daar êrens ‘n plek in jou huis of lewe waar jy God se teenwoordigheid tasbaar kan beleef? Waarheen gaan jy, wanneer jy ‘n diep behoefte het om met God kontak te maak? Waarom is hierdie plek vir jou so kosbaar?
• Die realiteit was eintlik dat God oral teenwoordig was. Die mense het hulle daaglikse lewe in God se teenwoordigheid uitgevoer. Hulle normale lewe waar hulle gewerk het en met ander interaksie gehad het, was die plek waar God met hulle verhouding wou hê.
• Waar in jou lewe voel dit asof God nie teenwoordig is nie? Waar leef jy asof jy dit op jou eie doen en God nie raaksien waarmee jy besig is nie? Hoe kan jy hierdie plekke ook geleenthede maak om God se teenwoordigheid te beleef? Hoe kan jy in hierdie alledaagse ruimtes voor God kniel en aanbid?

GEBED: