Dinsdag 4 Oktober 2022

Matteus 18:21
Daarna het Petrus na Jesus toe gekom en gevra: “Here, hoeveel keer moet ek my broer vergewe as hy iets verkeerds teen my doen? Selfs sewe keer?”

Om oor te gesels of te dink:

• Petrus kom baie vroom na Jesus. Sy vraag is bedoel om te klink asof hy baie vrygewig is in sy vergifnis aan ander. Die gebruik in die Joodse kultuur was om mense 3 keer te vergewe. Wanneer Petrus die vraag stel, probeer hy klink asof hy baie gelowig is met ‘n mens vir ander. Jesus kyk dwarsdeur dit. Hy sien hoe Petrus probeer om sy eie ego streel terwyl hy steeds soos die skrifgeleerdes die minimum vereistes probeer nakom van ‘n “goeie volgeling”.
• Eerste probleem met Petrus se stelling. Hy probeer goed lyk. Sy fokus is op hoe geestelik, liefdevol en verdraagsaam hy is teenoor wat die wet vra. Jesus gooi die appel kar om deur te sê ons moet 70 x 7 keer vergewe. Jesus probeer sê daar is nooit ‘n punt waar ons nie vergifnis vir ander moet gee nie.
• Is daar ‘n klein gedeelte van jou wat ook probeer vroom lyk in die oë van ander? Is daar aksies, handelinge en optredes wat dit moontlik kan verklap as mense naby genoeg na jou kyk?
• Wanneer Jesus kom en vir jou sê dit wat jy doen is nie genoeg nie. Jy moet nog meer gee. Hoe laat dit jou voel? Deel met die Here jou hart. Waarop probeer jy roem? Vra Jesus vandag vir jou iets anders?

Gebed:
Here, ek besef vandag dat U nie my goedheid wil hê nie. Ek besef dat my eie goedheid, slegs ‘n manier is waarop ek wil goed lyk, maar nie werklik goed is nie. Here, dankie dat ek vir U aanvaarbaar is, selfs toe ek nog nie eers probeer het nie. Help my Here, om werklik goed te word. Verander my hart. Help my om uit U goedheid te leef, en nie meer bekommerd te wees oor hoe dit my laat lyk nie. Meer van U here, en minder van myself.
Amen.