Maandag 12 September 2022

Romeine 12:2
“Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is.”

Om oor te gesels en dink
Paulus moedig die gemeente in Rome en ons aan om nie te tuis te raak in hierdie wêreld nie. Ons moet toelaat dat God ons denke van binne af vernuwe. Dit is wanneer ons keuses vir God en sy koninkryk maak, eerder as om op onsself en eie behoeftes te fokus. Dit is om afhanklik van God te lewe.
God se wil is nie iets wat ons maar net met ons laat gebeur nie. Ons moet bewustelik kies om te doen wat die Here van ons vra. Wanneer ons ons in stel om God se wil te doen, kan ons doen wat vir God goed, aanneemlik en volmaak is.

*Laat jy toe dat God jou denke vernuwe?
*Laat jy toe dat God se wil jou lewe bepaal?

Gebed
Here, ek kom vra dat U my denke sal vernuwe. Ek wil graag U wil onderskei en doen wat vir U goed en aanneemlik is. Mag ek vandag vir iemand U liefde wys. Amen.