Maandag 24 April 2023

Esegiel 36:26
“Ek sal julle ‘n nuwe hart en ‘n nuwe gees gee, Ek sal die kliphart uit julle liggaam uithaal en julle ‘n hart van vleis gee.”

Om oor te gesels en te dink
Esegiël herinner die volk aan die belofte van die Here dat Hy vir hulle ’n nuwe hart (denke) en ’n nuwe gees (gesindheid) sal gee. Hy gaan hulle kliphart uithaal en dit met ’n hart van vleis vervang.
Dit is ’n gebed wat ons elke dag kan bid, naamlik om ’n nuwe hart te ontvang.
Ons word soms so vasgevang in al die slegte nuus en fopnuus, dat ons die goeie nuus van hierdie belofte mis. God is die een wat ons denke en gesindheid verander. Ons moet onsself oopstel dat Hy as’t ware ’n hartoorplanting doen.

• Waarmee vul jy jou hart? Waaroor dink jy?
• Vra die Here om jou denke en gesindheid te verander deur vir jou ’n nuwe hart en ’n nuwe gees te gee.

Gebed
Here, ek het U lief en wil U volg. Kom gee my ’n nuwe hart en gees dat ek U daarmee kan dien en liefhê. Amen.