Maandag 25 April 2022

Jesaja 43:1
“Luister, so sê die Here wat jou geskep het, Jakob, wat jou gevorm het, Israel: Moenie bang wees nie, Ek verlos jou, Ek het jou op jou naam geroep, jy is Myne.”
‭‭
Om oor te gesels of dink
Ons reageer as ons op die naam genoem word. Dit is gewoonlik iemand wat jou ken of leer ken, want daar is ’n verhouding. Die Here is in verhouding met ons en Jesaja herinner die volk wat in ballingskap is, dat hulle hoef bang te wees nie, want die Here is by hulle. Nie alleen is Hy by hulle nie, Hy is die Een wat hulle geskep en gevorm het. Daarom sal Hy hulle verlos. Hy ken hulle op die naam. Hy is die Een wat die inisiatief neem. Hulle behoort aan Hom.
Net so kan ons vandag weet dat die Here ook jou op die naam ken en roep. Jy is Syne! Hy het jou geskep en gevorm. Jy hoef nie bang te wees nie. Hy staan in ’n kosbare verhouding met jou!

Neem ’n oomblik van stilte
Hoe voel jy om te weet dat die Here jou op jou naam ken en dat jy Syne is?

Gebed
Here, dankie dat U my op die naam geroep het en dat ek aan U behoort. Dankie dat U my geskep en gevorm het. Help my om nie bang te wees nie, want U verlos my. Amen.