Stilstaan oomblikke – Op pad na die kruis
Teksvers:
“En wat julle ook al sê of doen, sê en doen dit alles in die Naam van die Here Jesus en dank God die Vader deur Hom.” (Kol 3:17)

Identifiseer:
Maria se gasvryheid en liefde verander die wêreld. Paulus beaam dat alles wat ons doen en sê van Jesus se liefde moet getuig. Daarmee saam maak ‘n dankbare hart die verskil. Wanneer ons deel en gee soos Maria gegee het, is ons besig om die koninkryk van God ‘n werklikheid te maak.

Oriënteer:
Wat het jy hierdie week gehoor uit die verskillende hoeke wat ons na Joh. 12 gekyk het?
Wat sal jy graag meer wil begin doen?
Waar kan jy meer van jouself gee, soos Maria?

Bely:
Ek kom bely dat ek graag meer wil gee en meer van myself wil deel.
Ek wil nie soos Judas net aan myself dink nie, maar eerder soos Maria gee.

Bid:
Here, hoor my as ek vra dat ek dankbaar sal leef en alles sal sê en doen tot eer van U Naam. Amen.