Saterdag 14 Mei 2022

Genesis 1:1-31
_ So het dit gebeur. 31Toe het God gekyk na alles wat Hy gemaak het, en dit was baie goed. Dit het aand geword en dit het môre geword. Dit was die sesde dag._

Om oor te gesels of te dink:

• Het jy al ooit iets afgehandel, teruggestaan, daarna gekyk en gedink: “Sjoe, dit is goed! Baie baie goed!”? Dit is wat God doen aan die einde van die sesde dag. Dit is wat God doen aan die einde van sy skepping. Maar meer as dit, is dit wat God doen wanneer hy die mense klaar geskep het. God kyk na ons, en Hy dink dit is goed. Baie baie goed. En weereens. Meer as dit God dink nie net ons is goed nie. God seën ons ook.
• Hoe voel dit om te dink dat God na jou kyk en dat God dink jy is goed? Wat sou jy dink beteken goed? Hoe word goed gekwalifiseer of bepaal? Hoe sou jy dit nou van jouself sê? Hoe leef jy, wanneer jy leef asof jy nie dink jy is goed nie? Hoe sou jy leef as jy dink jy is wel goed, soos God sê?
• Lees weer die seën wat God uitspreek oor die mens. Wees vrugbaar, bewoon, bewerk, en heers. Hoe is jy vrugbaar, hoe bewoon, hoe bewerk en hoe heers jy waar God jou geplaas het? Hoe doen jy dit tot eer van God sodat ander God se naam kan groot maak? Hoe doen jy dit sodat ander steeds kan sien God se skepping is goed, baie baie goed?

Gebed:
Here, dankie dat U na ons kyk en dink die skepping is goed, baie baie goed. Dankie dat U ons seën. Here, ons as U skepping wil U Naam groot maak!
Amen.