Saterdag 27 Augustus 2022

Jakobus 1:2-5
“My broers, julle moet baie bly wees wanneer allerlei beproewings oor julle kom, want, soos julle weet, as julle geloof die toets deurstaan het, stel dit julle in staat om te volhard. En die volharding moet end-uit volgehou word sodat julle tot volle geestelike rypheid kan kom, sonder enige tekortkoming. As een van julle wysheid kortkom, moet hy dit van God bid, en Hy sal dit aan hom gee, want God gee aan almal sonder voorbehoud en sonder verwyt.”

Om oor te gesels en dink
Om wys te leef is nie altyd maklik nie. Jakobus herinner ons ook dat juis as dit moeilik gaan, ons moet volhard, sodat ons tot geestelike rypheid en wysheid kan kom. Ons dink party maal dat omdat ons Jesus volg, die lewe makliker moet wees. Maar Jakobus weet dat dit nie altyd maklik is nie. Ons gaan gebuk onder swaar kry en beproewing. Ons moet juis dan aan God vashou.
Jakobus herinner ons dat as ons juis wysheid kort kom, ons dit van God moet bid. Die belofte is dat God vir ons wysheid sonder voorbehoud en sonder verwyt gee.

*Waarvoor kort jy wysheid?
*Wat het jy hierdie week van wysheid geleer?

Gebed
Here, ek kom bid vandag weer vir wysheid. Dankie dat U altyd daar is en dit gee. Mag ek meer en meer wyser word, soos ek U elke dag volg. Amen.