Vrydag 20 Januarie 2023

Prediker 3:12-13
“Ek het tot die insig gekom dat daar vir ‘n mens niks beter is nie as om vrolik te wees en die goeie van die lewe te geniet. Dat die mens kan eet en drink en onder al sy arbeid nog die goeie kan geniet, ook dit is ‘n gawe van God.”

Om oor te gesels en te dink
Prediker gee vir ons die geheim van lewe en tyd. Ons moet ons tyd wys spandeer. Hoe doen mens dit? Jy kies om vrolik te wees en die goeie van die lewe te geniet. Die insig wat hy deel is dat dit ’n keuse is om positief en vrolik te wees.
Die voorreg om te kan eet en drink en werk is ’n gawe van God.
Ons kan maklik so vasgevang word in die skarrel van elke dag tussen werk en huis, wat ons moet eet en drink dat ons die gawe uit God se hand mis. Dus is die beste manier om ons tyd te gebruik om God te eer, is om in dankbaarheid alles as ’n gawe raak te sien.
Ons sê nie altyd genoeg dankie nie. Ons geniet nie altyd die lewe nie. Ons is bekommerd oor alles wat nog moet gebeur.
Kom ons kies God se goedheid vandag raak te sien.
*Waarvoor kan jy vandag alles dankie sê?
*Deel vandag jou vreugde met iemand met wie jy in aanraking kom.

Gebed
Here, dankie vir vandag. Dankie dat ek kan eet en drink. Soms mis ek dat dit ’n gawe uit U hand is. Mag ek vandag vrolik wees en die lewe geniet. Amen.