Vrydag 21 Oktober 2022

Romeine 12:6-8
“Ons het genadegawes wat van mekaar verskil volgens die genade wat God aan elkeen van ons gegee het. As dit die gawe van profesie is, laat ons dit gebruik in ooreenstemming met die geloof wat ons bely. As dit is om te dien, laat ons dien. As dit is om onderrig te gee, laat ons onderrig gee. As dit is om mense te bemoedig, laat ons hulle bemoedig. As ons gee, laat dit sonder bybedoelings wees. As ons leiding gee, dan met toewyding. As ons ander help, dan met blymoedigheid.”
‭‭
Om oor te gesels en dink
Ons het mekaar en mekaar se gawes nodig. Paulus maak ’n belangrike punt: elkeen van ons het ’n gawe, ja, jy ook. Daarom roep hy ons op om ons gawes te gebruik ter wille van mekaar. As jy nie jou gawe gebruik nie, ontneem jy mense om jou om daardeur verryk te word.
Weet jy wat jou gawe is? Gebruik jy dit om mense te dien?
Hierdie is voorbeelde van gawes en daar is nog meer. Paulus roep ons op om ’n verskil in die wêreld te maak deur mekaar te dien, onderrig, bemoedig, gee, lei en help. Wanneer ons dit doen, versorg die liggaam van Christus mekaar.
Deel jou gawe vandag met iemand. Moenie bang wees, want iemand het vandag jou gawe nodig.

Gebed
Here, ek is soms huiwerig om my gawe te deel. Ek dink soms dat wat ek het nie goed genoeg is nie, maar help my om myself en my gawe te deel met iemand. Amen.