Woensdag 20 Oktober

Matteus 23:23
23“Ek waarsku julle, Fariseërs en Joodse teoloë. Julle is pynlik presies oor hoe julle kerk hou en julle werk julle tiendes tot op die laaste sent uit. Maar as dinge gedoen moet word wat regtig vir God saak maak, skitter julle in julle afwesigheid. Ek praat van dinge soos om vir almal ’n regverdige kans te gee; of dat julle so vir mense omgee dat julle hulle graag wil help; of dat mense weet dat hulle julle kan vertrou. Ek sê nou nie die ander dinge wat julle doen, is noodwendig verkeerd nie. Maar dit is niks werd as julle nie ook die dinge doen wat regtig vir God saak maak nie.

Om oor te gesels of te dink:

• Ons gaan hierdie week na dink oor hoe Jesus die voorbeeld is van vrygewigheid.
• Ons staan steeds by Matteus stil. Maar vandag kyk ons na ‘n vermanende teks. Jesus praat slegs oor tiendes wanneer hy met die Fariseërs praat, die heiliges, die gelowiges, praat. Hulle is so trots op hoeveel hulle vir ander gee. Hulle werk dit tot op die sente uit sodat hulle kan spog daaroor. Jesus sê vir hulle, hulle doen dit met die verkeerde hart. Hulle wil spog, maar hulle harte is hard vir mense se nood en swaarkry. Hulle leef nie in ander opsigte vrygewig nie. Hulle is nie vrygewig met deernis, liefde, genade, omgee, ondersteuning, vergifnis en versoening nie.
• Hoe lyk jou lewe? Gee jy net wat jy moet soos die Fariseërs? Of leef jy vrygewig? Hou jy aan vra is dit genoeg? Of vra jy waar kan ek nog gee? Deel jou hart met die Here.
• Is daar bewyse van vrygewigheid in elke faset van jou lewe? Of is dit net beperk tot seker dele? Jou verhouding met God, jou verhoudings met ander? Jou werk? Jou tyd? Jou geld? Jou besittings? Jou huis? Jou talente? Jou kennis? Deel met die Here waar is daar nog ruimte vir groei as dit kom by vrygewigheid.

Gebed:
Leef jy jou hele lewe in vrygewigheid? Kan mense dit sien in hoe jy God dien? Kan mense dit sien in hoe jy jou medemens behandel? Vra vir die Here om eerlik vir jou te wys wat die realiteit is.
Leef jy ook vrygewig met dit wat die Here jou mee seën? Deel jy jou hart, jou besittings, jou tyd, jou geld? Vra dat die Here jou wys wat die realiteit is rondom dit wat jy deel.
Waar is daar steeds geleenthede waar jy die Here met ‘n lewe van vrygewigheid kan dien? Vra dat die Here jou oë sal oopmaak vir sulke geleenthede.
Amen.