Woensdag 29 Junie 2022

Romeine‬ ‭8:19-22‬
“Die skepping sien met gespanne verwagting daarna uit dat God bekend sal maak wie sy kinders is. Die skepping is immers nog aan verydeling onderworpe, nie uit eie keuse nie, maar omdat God dit daaraan onderwerp het. Daarby het Hy die belofte van hoop gegee: die skepping sal self ook bevry word van sy verslawing aan die verganklikheid, om so tot die vryheid te kom van die heerlikheid waaraan die kinders van God deel sal hê. Ons weet dat die hele skepping tot nou toe sug in die pyne van verwagting.”

Om oor te gesels of dink:
Dis nie net ons as gelowiges wat swaar kry nie, maar ook die skepping. Dit wat God geskep het kry swaar en die skepping sien ook uit om daarvan verlos te word en te wees soos God dit van die begin af bedoel het. Ons sien dit in die seisoene en die natuur. Paulus gebruik die beeld dat die skepping ook sug en swaarkry. Ons vergeet soms dat die natuur ook ly. Ons doen mee hieraan as ons nie die skepping beskerm en bewaar nie.
Ons kan daarna uitsien dat God sal bekend maak wie Sy kinders is en die skepping smag saam met ons daarna.
Waardeer die natuur en weet soos die skepping uitsien dat God verlossing bring, ons ook kan uitsien na die heerlikheid wat vir ons wag. Fokus op die mooi in die natuur. Dit herinner ons aan God se sorg.

Gebed
Abba, Vader, dankie dat ek U kind is. Ek is nie alleen nie. Ek sien saam met die skepping uit na die verlossing wat wag. Dankie vir die belofte van hoop wat U gee. Amen.