Woensdag 7 September 2022

Psalm 14:4-5 en Psalm 53:5-6
Julle wat onreg pleeg, wat my volk opeet asof julle brood eet, en wat weier om God te dien – weet julle dan nie dat daar iets vreesliks met julle gaan gebeur, (so vreeslik soos nooit tevore nie?*)
*Slegs Psalm 53 se Afrikaans. Die Hebreeus van albei verse is presies dieselfde.

Om oor te gesels:

• Hoe lyk onreg? Hoe sou jy dit vir ‘n kind beskryf wat nog nooit gehoor het van die woord nie?
• Die Psalmdigters begin in hierdie gedeelte bely wie hulle God is. Hulle ken Hom as ‘n liefdevolle Vader wat nie sy volk in die steek laat nie. ‘n God wat die mag het om verkeerdhede reg te stel. ‘n Verlosser wat Sy mense versorg, bewaar en vir hulle voorsien. Die wat onreg doen, dink daar is nie ‘n God nie, sal deur God self aangespreek word.
• Hoe laat hierdie gedagte jou voel? Wat sou jou belydenis van God wees? Hoe sou jou belydenis verskil in goeie tye en in swaarkry tye?
• Hou moed. God is steeds wie Hy nog altyd was. Hy het Sy mense nog nooit net gelos nie. Hy het alles gedoen om die verhouding te herstel, sodat ons vrygespreek voor hom kan staan. Die wat onreg doen, het nie die finale seggingskap nie.

Gebed:
Here, dit voel nie altyd asof U die wat onreg doen, aanspreek, keer of oorwin nie. Dankie Here dat dit wat U doen, nie beperk is deur hoe dit voel nie. Dankie dat U steeds daar is in die donker gevoelens, die moedelose gevoelens, die hartseer gevoelens, die swaarkry gevoelens, die vreugde gevoelens en die al die gevoelens tussen in. Dankie dat U met elkeen ‘n pad stap en rekenskap sal vra. Selfs die wat onreg doen. Help my, dat ek nie U taak op my skouers neem nie.
Amen