Vrydag 12 Januarie 2024
“Nadat Paulus dit gesê het, het hy brood geneem, God in die teenwoordigheid van almal gedank, dit gebreek en begin eet. Hulle het almal moed geskep en self ook begin eet. Ons was altesaam twee honderd ses en sewentig mense aan boord. Nadat hulle genoeg geëet het, het hulle die vrag koring in die see gegooi en so die skip nog ligter gemaak.”

Om oor te gesels en te dink
Die tiende padwyser vir 2024: “Om te bid vir mense wat met integriteit werk en leef te midde van onreg en korrupsie, en om hulle te bemoedig om te volhard. “
Dit is nie moeilik om moedeloos te raak oor al die onreg en korrupsie nie, maar ons kan kies om mense te bemoedig wat kans sien om ’n verskil te maak.
Soos Paulus op die boot een van die min gelowiges was, het hy nie geskroom om te getuig dat die Here hulle sal help nie. Al 276 mense is gered as gevolg van Paulus se lewe.
Laat ons soos ’n Paulus die brug wees om mense by God uit te bring. Laat ons ander mense bemoedig wat stukkie vir stukkie deursigtig aanwesig is om onreg terug te druk. Daar is baie meer mense wat met integriteit leef en ons moet hulle bemoedig en dit nie uit die oog verloor nie. Kom ons bly bid vir hulle.

Gebed
Here, ek kom bid vir elkeen wat ter wille van U Naam onreg beveg. Gee hulle en ons die moed om die regte dinge te doen. Laat ons die brug vir mense wees om U raak te sien. Amen.