Psalm 25:4-6
”Maak my u wil bekend, Here, leer my u paaie. Laat u waarheid my lei en onderrig my daarin, want U is God, my redder. In U stel ek elke dag my verwagting. Dink aan die liefde en trou, Here, wat U van altyd af betoon het.“

Om oor te gesels en te dink
Ons is aan die begin van die week en Psalm 25:4-6 rig ons gedagtes. Jy kan vandag hierdie paar verse as gebed gebruik om jou dag en week aan die Here op te dra. Vra die Here om Sy wil aan jou bekend te maak en dat jy op Sy paaie sal stap. Gebruik die Bybel dat Sy waarheid jou lei en dat jy daaruit kan leer. Ons doen dit omdat ons God vertrou as ons Redder. Ons kan elke dag ons verwagting in Hom stel omdat Sy liefde en trou van altyd af nog daar was en sal wees in die toekoms.

• Wat wil jy vandag vir die Here gee?
• Wat is jou verwagting van die Here?

Gebed
Here, ek kom bid dat U U wil aan my sal bekend maak. Ek het U lief en stel my verwagting in U. Amen.