2 Korintiërs 9:7
7Elkeen moet gee soos hy hom in sy hart voorgeneem het, nie met teensin of uit dwang nie, want God het die blymoedige gewer lief.

VRAE:

• In 2 Korintiërs 9 is Paulus besig om met die gemeente in Korinte te praat oor die manier waarop hulle gee. Een van die eerste punte wat hy maak is dat elkeen moet gee. Elkeen word nie net gevra om te gee nie, maar hulle word gevra om met ‘n blymoedige hart te gee. Vir Paulus is dit nie net belangrik dat elke gelowige moet gee nie, maar die manier waarop hulle gee, is belangrik.
• Wat gebeur by jou in jou gedagtes of in jou hart wanneer iemand begin praat oor gee? Wat is die gedagtes wat by jou opkom? Wat is die emosies wat in jou lyf gaan sit? Wat is al die redes waarom jy positief of negatief reageer? Deel jou hart met die Here.
• Elkeen moet gee soos hy in sy hart voorgeneem het. Wanneer jy gevra word om te gee, hoe bepaal jy wanneer jy gee en wanneer jy nie gee nie? Hoe bepaal jy wat genoeg is om te gee en wat jy nie sal gee nie? Wanneer jy gee, word dit bepaal deur jou waarneming van hoeveel die instansie op persoon verdien om te kry? Word dit bepaal deur wat jy dink die persoon daarmee gaan doen? Of word dit bepaal met die hoeveelheid wat jy glo God vir jou vra om te gee?
• Is gee vir jou ‘n saak van vreugde? Hoeveel keer het jy al gegee omdat dit vir jou lekker is en jy vreugde deur die hele belewenis kry? Waarom dink jy sou God wil hê ons moet gee met ‘n blymoedige hart?

Gebed:
Here, soms is dit vir my moeilik om te gee. Ek voel asof ek nie eers altyd genoeg het vir my en my familie nie. Soms voel dit vir my asof almal net goed by my wil hê. Here, dit voel nie asof ek eers wil gee nie. Here, ek vra dat U my hart sal verander. Here help om vreugde te vind in die hele proses van gee. Here, tot ek vreugde vind in die proses vra ek dat U dan vir my laat vreugde vind in U, omdat ek nader aan U hart leef. Dankie Here dat U vir my met blymoedigheid alles gegee het wat ek ooit sou kon benodig. Here, help my om meer soos U te wees.
Amen.