Stilstaan oomblikke – Op pad na die kruis
Teksvers:
“Toe sê Jesus: “Laat staan haar. Sy moes dit hou vir hierdie dag om My te salf vir my begrafnis.” (‭‭Joh. ‭12:7‬)

Identifiseer:
Jesus sien Maria se goeie daad raak en sê vir Judas om haar te laat staan. Maria se daad was eg en opreg. Dit was simbolies en profeties vir wat sou kom.
Judas probeer agter mooi woorde wegkruip, maar Jesus sien sy hart raak en spreek hom aan.

Oriënteer:
Maria wys ons om morsig te wees met liefde en diens. Maria maak ‘n verskil, al verstaan die ander dit nie. In Stilstaan oomblikke moet ons doen waarvan ons oortuig is, selfs as ander dit vreemd of moeilik vind. Ons moet nie net aan onsself dink nie, maar juis aan ander.

Bely:
Markus 14:9 sê dat orals waar die evangelie verkondig sal word, vertel sal word van wat Maria gedoen het.
Sy het alles op die spel geplaas omdat sy Jesus wou dien, ten spyte van wat mense sou dink. Ons bely dat ons ook soos Maria wil wees.

Bid:
Here, help my om te dien. Help my om meer van myself vir U en ander te gee. Amen.