Dinsdag 19 Oktober

Matteus 6:19-24)
19“Hou op om van die oggend tot die aand agter geld aan te hardloop. Niks hou hier vir altyd nie. Diewe breek oral in en steel, motte en goggas vreet alles op en ouderdom laat dinge vergaan. 20Maak eerder vir julle ’n bankrekening daar by God in die hemel oop. Geen dief kan ooit daar inbreek om iets te probeer steel nie. 21“Die dinge waarmee jy jou van vroeg tot laat besig hou, sê wat die belangrikste in jou lewe is. Jou lewe wys waar jy jou ‘rekening’ oopgemaak het. 22“As jy hemelse skatte wil opgaar, sorg dan dat jy jou oë deur die Here laat instel sodat jy op die regte manier daarmee kan kyk. Jou oë is soos ’n lig. As jy op die regte manier daarmee kyk, maak dit alles in jou lewe helder. 23Maar as jy jou oë nie deur God laat instel nie, maak jou oë jou hele lewe pikdonker. As daar geen goddelike lig in jou lewe skyn nie, is dit regtig nag binne-in jou. 24“Niemand kan vir twee base werk nie. Jy sal lojaal teenoor een wees en die ander een afskeep. Moet daarom nie eens daaraan dink om God en die geldgod saam te probeer dien nie. Jy moet kies in wie se diens jy wil staan.”

Om oor te gesels of te dink:

• Ons gaan hierdie week na dink oor hoe Jesus die voorbeeld is van vrygewigheid.
• Ons staan steeds by Matteus stil. In vandag se gedeelte sien ons hoe Jesus nie net sê dat vrygewigheid gebôre word in ‘n verhouding waar ons weet God voorsien en ons daarop kan vertrou nie. Maar dat ons lewens ook vrug sal wys van die keuse wat ons maak om in verhouding met God te wees. As ons kies om in verhouding met God te wees, dan sal ons lewe dit reflekteer dat ons skatte in die hemel vergader. Dit sal nie reflekteer dat ons net die gejaag na wind op aarde najaag nie.
• Een van die maniere waar ons duidelik kan sien of dit wat ons sê ons glo en dit wat ons lewens van getuig bymekaar kom, is om te kyk na dit waarmee ons, onsself heeldag besig hou. Waarop spandeer ons, ons tyd. Waarom doen ons wat ons doen? Hoe doen ons, wat ons doen?
• Om hard te werk vir die geld wat jy verdien is nie ‘n slegte ding nie. Maar terwyl jy dit doen kan jy dit doen tot eer van God, jy kan dit doen met die oog om dit te deel met ‘n vrygewige hart, jy kan dit doen deur ‘n geur van God in die werkplek te wees, jy kan dit doen sonder om die geld na te jaag, maar eerder die werk met trots en vreugde te doen. Met watter houding gaan werk jy? Waarom doen jy wat jy doen? Reflekteer die manier waarop jy werk iets van jou verhouding met die Here? Is jou werk belangriker as jou verhouding met die Here, jou eggenoot, jou kinders, jou medemense?

Gebed:
As jy na die vrug van jou lewe kyk, getuig dit van die feit dat God jou eerste prioriteit is? Deel jou hart met die Here.
As ander na die vrug van jou lewe sou kyk, sou hulle sê dit getuig van die feit dat God jou eerste prioriteit is? Deel jou hart met die Here.
Hoe kan die vrug van jou lewe meer getuig van vrygewigheid vanuit ‘n lewende verhouding met die Here? Vra dat God vir jou geleenthede sal wys waar jy vrygewig kan leef.
Amen