Dinsdag 28 Junie 2022

Romeine‬ ‭8:17-18‬
“En omdat ons kinders is, is ons ook erfgename. Ons is erfgename van God, erfgename saam met Christus. Aangesien ons deel het aan sy lyding, sal ons ook deel hê aan sy heerlikheid.
Ek is daarvan oortuig dat die lyding wat ons nou moet verduur, nie opweeg teen die heerlikheid wat God vir ons in die toekoms sal laat aanbreek nie.”

Om oor te gesels of dink:
Ons is kinders van God wat Hom Vader kan noem, maar meer as dit is ons mede-erfgename saam met Christus. Dit gee vir ons die moed om te kan aangaan, terwyl ons ook swaar kry en lyding ervaar. Ons gaan in Sy heerlikheid deel en daarom verklaar Paulus dat die lyding wat ons nou verduur nie opweeg teen die heerlikheid wat ons saam met God sal beleef nie. Jesus het gely, maar het in God se heerlikheid ingegaan. Net so sal ons in God se heerlikheid ingaan, al kry ons swaar.
Laat ons nie moedeloos word nie, maar vashou aan Jesus wat ons bystaan in ons swaar kry en lyding.
As jou lyding te veel voel, fokus op die Vader se belofte dat jy Sy kind is en dat Hy jou nooit in die steek sal laat nie.

Gebed
Abba Vader, dankie dat ek U kind en erfgenaam is. My swaarkry is soms te veel, maar ek hou vas aan U en U beloftes. Ek sien uit na die heerlikheid saam met U. Amen.