Dinsdag, 6 Julie

Dien – Dade van diensbaarheid

Hebreërs 6:10
10God is nie onregverdig nie: Hy sal julle werk nie vergeet nie en ook nie die liefde wat julle vir sy Naam betoon het deurdat julle julle medegelowiges gedien het en nog dien nie.

Om oor te gesels of te dink:

• Die Here het ons almal uniek geskep. Wanneer ons ander dien is dit belangrik dat ons onthou om ander te dien nie op die manier wat ons graag gedien wil wees nie, maar op die manier wat hulle werklik nodig het. Dit beteken dat ons in gesprek met ander moet wees. Dit veronderstel dat ons verhoudings kweek en vra wat die behoefte is.
• Vandag kyk ons na maniere waarop ons ander mense kan dien deur dade te doen waarop ons diensbaar vir hulle kan wees. Die teks verwys spesifiek na die maniere waarop ons, ons medegelowiges dien. Maar indien dit op jou hart gedruk word om ‘n daad van diensbaarheid te doen vir iemand wat nie glo nie, is daar niks wat in jou pad staan nie.
• Hoe lyk dade van diensbaarheid? Wat vra dade van diensbaarheid vir jou? Watter verskonings gee jy gewoonlik waarom jy nie dade van diensbaarheid kan uitvoer nie? Hoe laat dade van diensbaarheid jou voel? Deel jou hart met die Here.
• Diens voorstel vandag: Bel ‘n medegelowige en vra vir hulle wat jy vir hulle kan doen. (Dink veral aan die wat Covid positief en siek is) Moontlike idees kan insluit: ‘n Ete maak en bring, die gras sny, inkopies gaan doen, medisyne by die apteek optel en bring, die troeteldiere neem vir ‘n loop, ens.

Gebed:
Here van my lewe,
Help my om U wonderlike geur oral te versprei. Laat my siel oorloop met U Gees en U liefde. Here neem so totaal beheer van my lewe dat al wat mense kan sien is die buitengewone lig wat U skyn deur my. Skyn deur my op so ‘n manier dat elke siel met wie ek in kontak kom U teenwoordigheid sal ervaar. Laat elke mens opkyk na U en net U raaksien. Here, bly asb by my sodat ek kan begin skyn, en deur te skyn, kan ek skyn met ‘n warmte wat die ander wys na U, die ware lig. Here, dit is waarom ek vandag wil dien.
Amen