Dinsdag 9 Augustus 2022

Psalm 37:1-2
“_ Moet jou nie ontstel oor skelms en jou kwel oor skurke nie, want soos gras vergaan hulle gou en soos groenigheid verdwyn hulle sommer._”

Om oor te gesels en dink
Psalm 37 se opskrif is “Laat jou lewe aan die Here oor.” Dit is ‘n wysheidspsalm wat nadink oor die lewe en perspektief gee. Dit begin amper vreemd met die woorde om jou nie te ontstel en kwel nie. Tog is daar ‘n stuk waarheid in wat die Boodskap treffend vertaal: “Moenie jou energie mors om heeltyd oor slegte mense te praat nie. Moenie loop en kla dat hulle loskom met hulle skelmstreke nie. Moenie op hulle jaloers wees nie.”
‭Ons mis die lewe as ons heeltyd op dinge fokus wat ons vreugde steel. Ons sukkel dan ook om die Here te vertrou en op Hom te wag.
Ons moet ons gedagtes bewaar en kies waaraan ons aandag gee. Ons moet nie heeltyd in vrees en angs vasgevang wees nie. Die Here ken hulle einde. Kom ons laat ons lewe aan die Here oor en vertrou wagtend op Hom.

Gebed
Here, ek kom gee my lewe aan U oor. Help my om eerder op U te fokus as op dinge wat my ontstel. Ek wil U bly volg. Amen.