Donderdag 14 Julie 2022

Jesaja 61:3
“die dag waarop Hy vir dié in Sion wat treur, eer gee in plaas van smart, vreugde in plaas van droefheid, blydskap in plaas van hartseer.”

‭‭Om oor te gesels of dink:
Jesaja kom gee vir die volk hoop met die woorde dat die Here hulle nie vergeet het nie. Hulle is terug uit ballingskap en moedeloos oor die toestand van Jerusalem. Hulle sien net verwoesting, tog verseker die Here dat Hy hulle situasie gaan verander. Hy gaan die smart, droefheid en hartseer verander in eer, vreugde en blydskap.
Daar is ’n geskenk in jou situasie. Die “as” wat jy kan dink is die einde, het ’n geskenk om jou nuwe dinge te laat ontdek. Jy kan meer van God, ander en jouself ervaar. Ons kan nie hierdie geskenke mis omdat ons só op die krisis fokus nie. Die Here besig om jou “as” in ’n kunswerk te verander.

Gebed
Here, ek mis soms die geskenk van U troos en liefde in my situasie. Help my om dit raak te sien en te weet U is by my teenwoordig. Amen.