Donderdag 15 September 2022

Jakobus 4:15-16
“Julle moet eerder sê: “As die Here wil, sal ons lewe en sal ons dit of dat doen.” Maar nou is julle te seker van julleself en praat julle groot. Al sulke grootpratery is verkeerd.”

Om oor te gesels en dink
Daar is ’n verskil om te sê jy doen die wil van die Here en om dit regtig te doen. Jakobus waarsku teen sulke grootpratery. Dit is arrogant om te sê jy onderwerp jou aan die Here se wil, maar dan doen jy tog net wat jy wil. As ons God buite rekening laat met ons planne is ons eintlik praktiserende ateïste. Ons doen nie wat ons bely nie. Dit gaan net oor onsself.
Dit is soms nodig om ons gebedslewe te ondersoek. Is ek opreg as ek vra dat die Here se wil geskied, of wil ek net my eie wil laat geskied.
Wanneer God se wil geskied moet ek gehoorsaam wees om Hom steeds te volg, al is dit nie soos wat ek dit verwag het nie.

Gebed
Here, ek wil U volg en U wil doen. Help my om U wil te doen. Ek onderwerp my vandag opnuut weer aan U wil. Amen.