Donderdag 24 November 2022

Johannes 17:1-5 (1983 Vertaling)

3 En dit is die ewige lewe: dat hulle U ken, die enigste ware God, en Jesus Christus, wat deur U gestuur is.

Wanneer spandeer jy rustige, ononderbroke, onversteurde en intensionele tyd saam met die Vader?
Wanneer skuif jy alle moontlike afleidings een kant toe en ervaar intimiteit met die Skepper en Onderhouer van alles, insluitende jou?

Jesus onderbreek Sy eie gebed met hierdie kort maar kragtige stukkie lering in vers 3. Die ewige lewe is te vinde in ’n verhouding met God. ’n Verhouding waaraan jy deelneem, ’n verhouding waarin jy geken word, ’n verhouding wat verby kopkennis beweeg na ware intimiteit.

“Ewige” verwys nie na die lengte of hoeveelheid dae in hierdie lewe nie. Nee, dit verwys eerder na ’n kwaliteit van lewe. Die lewe wat by God te vinde is, is ware lewe, oorvloed lewe, lewendige lewe, volop lewe!
Ons ontvang hierdie lewe die oomblik wat ons ons geloof in Jesus plaas en versoen word met die Vader, wat ’n voorreg! Hierdie lewe is nie te vinde in ’n godsdiens of ’n gedragskode nie, maar in ’n persoon. Dit is die waarheid! Ons kan die ewigheid nou beleef!

Ons lewens is vol afleidings. Ons het nou, waarskynlik meer as ooit tevore, baie meer dinge wat ons aandag soek of wat ons eerder kan doen as om tyd saam met die Vader te spandeer. Dit is ’n uitdaging, een wat ons nodig het om aan te vat as ons die vrug van intimiteit met die Vader wil beleef en wil dra.

Dink na oor die volgende oomblikke in jou dag, en hoe hierdie oomblikke jou na die arms van die Vader kan lei:

• Hoe staan jy op in die oggend?
• Hoe eet jy middagete?
• Hoe bestuur jy?
• Hoe gaan slaap jy?
• Wanneer en hoe bid jy?

“If God is holy, then He can’t sin. If God can’t sin, then He can’t sin against me. If He can’t sin against me, shouldn’t that make Him the most trustworthy being there is?” Jackie Hill Perry