Donderdag 28 April 2022

Lukas 10:41-42
Maar die Here antwoord haar: “Marta, Marta, jy is besorg en bekommerd oor baie dinge, maar net een ding is nodig. Maria het die beste deel gekies, en dit sal nie van haar weggeneem word nie.”

Om oor te gesels of dink
Net soos die Here Sy volk op die naam geken en geroep het, kom Jesus en doen dieselfde. Hy ken vir Marta en Maria op die naam en praat met hulle wanneer Hy saam met hulle is.
Ons is nie maar net nommers vir Jesus nie. Hy ken elkeen van ons op ons naam. Hy staan in ‘n liefdesverhouding met ons.
Wat sou Jesus vandag vir jou sê as Hy by jou is? Dalk dieselfde as vir Marta? Jy is besorg en bekommerd oor baie dinge? Wil jy nie soos Maria kies om my te vertrou en tyd saam met my te spandeer nie?

Neem ’n oomblik van stilte
Hoe voel jy dat Jesus jou op die naam ken?
Wat sal Jesus vir jou sê?
Is jy meer soos Marta of Maria?

Gebed
Here Jesus, ek raak soms so besig dat ek U mis. Ek vergeet dat U my so goed ken. Help my om U te vertrou en by U te wees. Amen.