Donderdag 29 Oktober

Matteus 14:28-32
28 Toe sê Petrus vir Hom: Here, as dit regtig U is, beveel my om op die water na U toe te kom. 29 Kom! sê Hy. Petrus het uit die skuit geklim, op die water begin loop en naby Jesus gekom. 30 Maar toe Petrus sien hoe sterk is die wind, het hy bang geword en begin sink en uitgeroep: Here, red my! 31 Dadelik het Jesus sy hand uitgesteek, hom gegryp en vir hom gesê: Kleingelowige, waarom het jy begin twyfel? 32 Hulle het toe in die skuit geklim, en die wind het gaan lê.

Om oor te gesels:
God roep ons om met ons boot uit ons veilige hawens uit te kom en die oseaan aan te durf. En dan kom daar tye wat Hy jou selfs die kans gee om in die storms uit die boot te klim en op die water te loop.

Ons grootste bang is dat ons in storms sal kom as ons die lewenssee aandurf soos ons die week hoor ons moet. Maar dan kom daar die tye dat in die lewensstorms ons God by ons sien en dan self regkry om op water te loop. Ja soms kry ons in die moeilikste tye die onmoontlike reg. Met ons hand uitgestrek na God.

Waag jy selfs die onmoontlike omdat God met jou is? Sien jy nog kans om op water te loop met God in die oog? Of sink ons in ons eie moedeloosheid storms in omdat ons die oog van God afvat?
God vra van ons om uit ons veilige hawens uit te gaan en die stormsee van die lewe aan te durf. En dan wil Hy jou die kans gee om in geloof op die water te loop…die onmoontlike te doen! Sien jy kans hiervoor? Weet God ken jou vermoëns en gawes. Hy sal jou nie vat waar Sy genade jou nie kan beskerm nie!

Gebed

• Here gee my die moed om die lewens storme aan te vat.
• Help my Here om selfs hierin nie my oë van U af te vat nie.
• En as U my roep om die onmoontlike te doen, vat my hand en lei my daarin Heer. Want ek weet uit eie krag sal ek net sink.
  Amen.