Donderdag 3 Maart 2022

1 Petrus 5:6-14 (Die Boodskap)

8 In die geestelike stryd moet julle op en wakker wees. Julle het ’n gevaarlike vyand, die duiwel. Hy loop rond soos ’n honger leeu wat iemand soek om te verskeur. As hy julle aanval, moet julle met julle geloof in die Here terugveg. 9 Moenie toelaat dat hy julle geestelike fondamente skud nie. Laat dít vir julle ’n troos wees: daar is Christene oor die hele wêreld wat as Christene dieselfde dinge as julle ly omdat hulle dieselfde stryd as julle stry.

In vers 9 noem Petrus een van die maniere waarop die duiwel ons wil verskeur: deur ons geestelike fondamente te skud. Ons moet hierteen veg, en altyd gereed staan om die duiwel teen te staan, baie soos die dame in die foto hierbo.
Tom Schreiner sê: “The call to resistance does not summon believers to do Herculean acts on God’s behalf…. No, resisting the devil means that believers remain firm in their faith, that is, in their trust in God.”

Die Bybel leer vir ons dat ons standvastig in geloof bly deur eenvoudige goed te doen soos te bid, die Bybel te lees, deel te wees van ’n geloofsfamilie, en gehoorsaamheid aan wat die Gees van ons vra.
Jakobus 4:7 sê: “Wees gehoorsaam aan God en net aan Hom. Verklaar die duiwel vyand nommer een in jou lewe en gee hom nie ’n enkele kans nie. Hy sal dan van jou af padgee omdat hy niks kan regkry nie.” (Die Boodskap)
Ons sien in Matteus 4:11 en Lukas 4:13 dat die duiwel van Jesus af padgegee het toe Jesus hom nie ’n kans gegee het nie.

Alles wat Petrus hier beskryf is baie intense ervarings, en dit is nooit iets wat maklik is nie, maar in Christus is ons oorwinnaars, en kan ons wenners in hierdie geveg wees.
Die goeie nuus is ook dat ons nie alleen is nie, ons is deel van ’n familie “oor die hele wêreld” wat dieselfde stryd as ons stry.

Om oor te dink

• Het jy onlangs misluk in jou standvastigheid van geloof toe jy versoek is?
• Wat het jou onlangs gehelp om vas te staan teen die versoeking van die duiwel?