Donderdag 3 November 2022

Romeine 8:38-39
“Hiervan is ek oortuig: geen dood of lewe of engele of magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.”

Om oor te gesels en dink
God se genade is oorvloedig en meer as wat ons ooit kan verdien. Paulus herinner ons dat niks waarvoor ons bang is, ons ooit van die liefde van God kan skei nie. Hy verklaar dit in ’n belydenis dat daar niks is wat ons van God se liefde kan skei nie. God se liefde in Jesus Christus het geen einde nie.
Ons kan dit waarvoor ons bang is vir die Here kom gee, want selfs dit sal ons nooit van Sy liefde kan skei nie.
Kan jy dieselfde vandag sê?
Is daar dinge wat jou laat wonder oor God se liefde?
Maak vandag die keuse om vas te hou as hierdie waarheid dat ons enigste troos in lewe en in dood is dat ons aan Jesus Christus behoort en niks ons ooit daarvan sal kan skei nie.

Gebed
Here, dankie vir U liefde! Dankie dat niks my van U liefde kan skei nie. Mag ek vandag U liefde op ’n nuwe manier ontdek en beleef. Amen.