Maandag 21 November 2022

Johannes 17:1-5 (1983 Vertaling)

1 Nadat Jesus dit gesê het, het Hy na die hemel toe opgekyk en gesê:…

Dink vir ’n oomblik aan jou asemhaling… Dit is so deel van ons lewens dat dit outomaties gebeur, selfs wanneer ons slaap. Sonder die vermoë om asem te kan haal, kan ons nie lewe nie.

Vir ’n volgeling van Jesus, en vir Sy Kerk, is gebed soos asemhaling. Ons kan eenvoudig nie sonder gebed vir Jesus getrou volg nie.

• Sal iemand wat jou goed ken jou as ’n bidder beskryf?
• Ervaar jy ons geloofsfamile as ’n biddende familie?

Ek is oortuig daarvan dat ons as ’n geloofsfamilie tans sukkel om te bid, beide as individue en as ’n geloofsfamilie. Ek ervaar gereeld hoe ons bid vir spesifieke nood, of iets waaroor ons dringend ’n antwoord of ’n uitslag wil hê. Ek ervaar ook hoe daardie selfde dringendheid en passie verdwyn wanneer dit waarvoor ons bid opgelos of verby is. Ons kan nie net nou en dan gefokus asemhaal nie, ons kan ook nie net nou en dan gefokus bid nie.

Johannes 17 is ’n kragtige gebed van Jesus. Ons lees hoe Jesus bid, en waarvoor Jesus bid. Dit is ’n gebed waarin ons unieke insig kry oor wat op die hart van die Koning van die heelal is wanneer Hy met Sy Vader praat.

Soos ons hierdie week deur hierdie 5 verse werk, vra jouself na elke dag se dagstukkie of jou gebede belyn is met Jesus se gebed.

Om oor te dink vandag:

1. Hoe bid jy?
2. Waarvoor bid jy?
3. Wanneer bid jy?

“Prayer does not blind us to the world, but it transforms our vision of the world, and makes us see it, all men, and all the history of mankind, in the light of God. Thomas Merton