Maandag 8 November

Eksodus 4:1-2
1Maar toe sê Moses: “Sê nou die Israeliete glo my nie en hulle luister nie na my nie en hulle sê die Here het nie aan my verskyn nie?” 2Toe vra die Here vir hom: “Wat het jy in jou hand?” “’n Kierie,” antwoord Moses.

Om oor te gesels of te dink:

• Moses is hier besig om met God in gesprek te wees. En soos ons almal maar doen, is hy besig om die verkeerde vrae te vra. Wanneer God vir hom ie geleentheid gee om die geskiedenis van Israel te verander is Moses nie net besig om verskoning te maak nie, maar hy wil ook dit wat in ander mense se hande is probeer oplos. God help hom deur eerder te kyk na wat in sy eie hand is.
• Dink bietjie na oor wat in ander se hande is. Wat daarvan probeer jy verander of oplos? Hulle keuses, gedagtes, emosies, optredes, besluite, drome, woorde, denke, houding, oortuigings, ens? Hoe laat dit jou voel as jy hierop fokus en nie iets regkry of ‘n verskil maak nie? Praat met God oor jou behoefte om dit wat in ander se hande is te probeer verander of hanteer.
• Soms probeer ons selfs dit wat in God se hande is oorneem. Die een vraag (wat soms soos ‘n aantuiging word) is: Waarom? Hoekom? As ons antwoorde kry sal ons kan optree, aanbeweeg of verander. Ons moet weet sodat ons kan sin maak uit die situasie of lewe. Hoe laat dit jou voel om te weet dat hierdie antwoord nooit vir jou genoegsaam gaan verduideliking bring nie? Dat dit ook nie in jou hand is nie? Dat dit die verkeerde vraag is? Praat met God daaroor.
• Wat is in jou hand? Jou gedagtes, jou optrede, jou keuses, jou besluite, jou drome, jou woorde, jou reaksies, jou oortuigings, jou keuse om aan God oor te gee of gehoorsaam te wees, jou lewe tot nou, jou beroep, jou verhoudings, jou ouerskapstyl, jou agtergrond, jou lewenservaring, jou talente, jou gawes, jou opleiding, jou karakter. Daar is so baie wat jy het om te bied. Die Here wil dit alles gebruik om die geskiedenis van jou gesin, gemeenskap en land te verander. Praat met God oor wat in jou hand is en hoe dit jou laat voel.

Gebed:
God gee my die kalmte van gemoed
om die dinge te aanvaar wat ek nie kan verander nie;
moed om die dinge te verander wat ek kan;
en wysheid om die verskil te ken.

Help my om net een dag op ‘n slag te lewe;
om een oomblik op ‘n slag te geniet;
om te aanvaar dat swaarkry deel is van die pad na vrede;
om soos Jesus, hierdie sondige wêreld te neem soos dit is, nie soos ek dit wil hê nie;
om te vertrou dat U alles sal regmaak
as ek my aan U Wil oorgee;
en dat ek redelik gelukkig kan wees in hierdie lewe
en uiters gelukkig met U kan wees vir ewig in die volgende.
Amen.