Saterdag 17 September 2022

Psalm 25:4-5
”Maak my u wil bekend, Here, leer my u paaie. Laat u waarheid my lei en onderrig my daarin, want U is God, my redder. In U stel ek elke dag my verwagting.”

Om oor te gesels en dink
Ons het hierdie week nagedink oor die wil van God. Dit is ’n tema wat deur die Bybel strek. As gelowiges bly dit vir ons ’n ingesteldheid en soeke na God se wil. Ons onderwerp ons aan God se wil. Dit bly ’n voortdurende proses. Ons kan nie dink ons het dit een maal gevind en dan bly dit so nie. Ons moet elke dag bid dat die Here vir ons die pad wys.
Die Psalmskrywer beaam dit as hy in sy gebed vra dat God se waarheid hom sal lei en onderrig. Omdat God ons redder is, kan ons hom vertrou. Laat ons nie op hou om elke dag ons verwagting in die Here te stel nie.

Gebed
Here, ek wil soos hierdie Psalm kom bid: maak my u wil bekend. Ek stel vandag weer my verwagting op U. Dankie dat U getrou is. Amen.