Saterdag 8 Mei

Matteus 13:47-52

47 “Verder gaan dit met die koninkryk van die hemel soos met ’n treknet wat in die see gegooi is en allerhande soorte vis vang. 48 As dit vol geword het, sleep hulle dit op die strand uit en gaan sit om die goeie vis in mandjies bymekaar te maak, maar die onbruikbares gooi hulle weg. 49 So sal dit by die voleinding van die wêreld wees. Die engele sal uitgaan en die slegtes skei van die goeies 50 en hulle in die brandende oond gooi. Daar sal hulle huil en op hulle tande kners.”
51“Verstaan julle al hierdie dinge?” “Ja,” antwoord hulle Hom. 52 Hy sê toe vir hulle: “So is elke skrifgeleerde wat ’n leerling word in die koninkryk van die hemel, soos ’n huiseienaar wat uit sy voorraad nuwe en ou dinge te voorskyn bring.” (Mat 13:47-52)

Om oor te gesels
Ons het hierdie week by die gelykenisse oor die koninkryk stilgestaan. Die gelykenis van die treknet het dieselfde betekenis as dié van die onkruid. Ons kan nie besluit wie deel van die koninkryk is en wie nie. Ons leef saam met gelowiges en ongelowiges en dit is nie altyd maklik nie. Dit is God wat oordeel. Dit is nie vir ons beskore om dit te doen nie. Ons kan maar net agter Jesus aangaan en Hom vertrou.
As volgeling van Jesus ontdek ons heeltyd nuwe en ou dinge, selfs al verstaan ons nie altyd alles nie. Soos ons groei in ons geloof leer ons meer van God, onsself en ander. Ons moet nooit op hou om te leer en te ontdek waar Jesus se koninkryk aan die gebeur is nie.

  • Wat het jy hierdie week uit die gelykenisse van Jesus geleer?
  • Wat kan jy doen om nuwe en ou skatte in God se Woord te ontdek?

Gebed
Here, dit is soms moeilik om nie te oordeel nie. Help ons om agter U aan te stap en nuwe en ou skatte saam met U te ontdek. Amen.

Nog om na te kyk

WORD DEEL

PBO REGISTRASIE

930005265
Suid Afrika

linkedin facebook pinterest youtube rss twitter instagram facebook-blank rss-blank linkedin-blank pinterest youtube twitter instagram