Vrydag 24 Junie 2022

Matteus 7:7-8
7“Vra, en vir julle sal gegee word; soek, en julle sal kry; klop, en vir julle sal oopgemaak word, 8want elkeen wat vra, ontvang; en elkeen wat soek, kry; en vir elkeen wat klop, sal oopgemaak word.

Om oor te gesels of te dink:

• Die hartseer van die lewe is dat ons soms nie weet waarvoor om te vra nie. Ons kon dalk hulp gekry het, as ons net gevra het vir hulp. Wanneer ons nie weet nie, kan ons vra. Jesus sê vir ons, ons kan vra en vir ons sal gegee word. En in onkunde sou ons waarskynlik kon vra vir alles wat nie werklik saak maak nie. My gebed is, dat ons egter Jesus se voorbeeld sou volg en vra vir dit wat werklik saak maak. Dat ons sou vra dat ons liefde vir God en ons liefde vir mense sou toe neem. Dat ons wil meer in lyn met God se wil sal wees. Dat ons harte sal begin klop soos God se hart.
• Waarvoor vra jy gewoonlik? Kyk na jou afgelope week se gebedslewe. Waarvoor het jy gevra? Wat is die inhoud? Is dit waarvoor jy vra op jou hart, of God se hart? Is dit waarvoor jy vra groot genoeg dat jy dit kan bewerkstellig, of so groot dat God alleen dit ‘n werklikheid kan maak? Wat getuig dit wat jy vra van jou geloofslewe?
• Hoe wil jy dit waarvoor jy vra verander?

Gebed:
Here, ek dink nie altyd oor dit waarvoor ek vra nie. Vandag besef ek, dat dit waarvoor ek vra, ‘n getuienis is van my Geloof in U. Here, help my om meer te glo. Help my om anders te dink en glo oor hoe ek vra.
Amen.