Vrydag 3 Februarie 2023

Matteus 25:34-35
34“Dan sal die Koning vir dié aan sy regterkant sê: ‘Kom, julle wat deur my Vader geseën is! Die koninkryk is van die skepping van die wêreld af vir julle voorberei. Neem dit as erfenis in besit,… 36 siek, en julle het My verpleeg;

Om oor te gesels of te dink:

• Hoe lyk dit om siek te wees? Hoe voel dit as jou lyf teen jou werk, swak word en nie meer wil doen wat hy/sy wou doen toe jy gesond was nie? Was daar al ooit ‘n geval waar jy so siek was vir ‘n geruime tyd? Wat gebeur binne jou gedagtes? Wat het jy nodig om gesond te word en gesond te voel? Deel sommer jou gedagtes met die Here.
• Daar is verskeie siektes in hierdie wêreld wat ons liggaam, siel en gees aantas en afbreek. Het jy ‘n siekte wat jou liggaam, siel of gees aantas of afbreek? Kon jy al vrede maak hiermee? Waar is God in hierdie siekte? Deel jou hart met die Here.
• Dit is ‘n stryd om iemand te kry wat jou simptome ernstig neem, jou die regte medikasie kan gee, jou te help moed hou terwyl jy bid om gesond te word, jou op te tel wanneer die simptome iets is waarmee jy moet leef, jou versorg terwyl jy nie lekker voel nie. Het jy sulke mense in jou lewe wat jou versorg as jy siek is? Laat jy hulle toe om jou te versorg as jy siek is? Deel sommer jou hart met die Here oor jou gedagtes in hierdie verband.
• Is daar mense in jou lewe wat ‘n siekte het wat hulle liggaam, siel of gees aantas of afbreek? Hoe kan jy hulle versorg? Hoe kan jy luister en die siekte ernstig neem? Hoe kan jy hulle help om die regte medikasie te kry? Hoe kan jy hulle help moed hou terwyl julle bid vir genesing? Hoe kan jy hulle optel en ondersteun terwyl hulle met die simptome moet saamleef? Hoe kan jy hulle versorg terwyl hulle nie altyd lekker voel en die beste weergawes van hulleself is nie? Deel jou hart met die Here en vra vir wysheid.

Gebed:
Here van my lewe,
Ek is soms siek en kry swaar. Fisies, emosioneel en geestelik. Dankie dat U die geneesheer is, en dat U ook mense stuur om my te versorg in hierdie tye. Here help my om ook vir ander wat siek is en swaar kry te kan versorg. Here, help my om belang te stel, om te gee en in tee tree, self wanneer ek self bang is vir dit wat siek maak. Here help my om met my eie ongemak vrede te maak, en U hande en voete in alle omstandighede te wees.
Amen.