Vrydag 8 April 2022

Stilstaan oomblikke – Op pad na die kruis
Teksvers:
’n Tweede keer het Hy gaan bid en gesê: “My Vader, as hierdie lydensbeker nie by My kan verbygaan sonder dat Ek dit drink nie, laat u wil geskied.” Toe Hy terugkom, kry Hy hulle weer aan die slaap, want van die vaak kon hulle nie hulle oë oophou nie. (Matteus 26:42-43)

Identifiseer:
Jesus bid weer en ons sien dat Sy gehoorsaamheid toeneem. Jesus aanvaar dat as die lydensbeker nie by Hom kan verby gaan nie, Hy sal berus by die Vader se wil. Jesus is besig om oor te gee en die Vader te vertrou. Dit is egter nie maklik nie, maar ons sien progressie.

Oriënteer:
Ons kan by Jesus leer. Ons wil partymaal bid dat lyding net verby gaan. Tog bid Jesus dat as dit nie kan gebeur nie, Hy dit aanvaar. So kan ons ook leer om steeds te bly bid dat die Vader se wil sal geskied. Selfs al is dit vir ons baie moeilik.
Waarmee worstel jy tans? Gee dit oor vir die Here.

Bely:
Ek kom bely dat ek nie altyd wil oorgee en in gehoorsaamheid aanvaar wat besig is om met my te gebeur nie.
Ek bely dat ek U meer wil vertrou en my meer wil onderwerp aan U wil in my lewe. Ek bely dat ek myself weer vir U gee.

Bid:
Here, ek kom gee dit waarmee ek worstel vir U. Mag ek in gehoorsaamheid ook bid dat as dit nie kan nie, U my steeds sal help. Amen.