Vrydag, 9 Julie

Dien – Gee van Geskenke

2 Korintiërs 9:6-8
6Dink daaraan: wie karig saai, sal karig oes; en wie volop saai, sal volop oes. 7Elkeen moet gee soos hy hom in sy hart voorgeneem het, nie met teensin of uit dwang nie, want God het die blymoedige gewer lief. 8En God is by magte om aan julle alles in oorvloed te skenk, sodat julle in alle opsigte altyd van alles genoeg kan hê en volop kan bydra vir elke goeie werk.

Om oor te gesels of te dink:

• Die nood in ons wêreld is tans baie groot. Ons hoef nie eers ver te gaan om dit raak te sien nie. Ons as gelowiges het nog altyd uit die oorvloed wat God aan ons gee, vir ander gegee. Die teks vandag herinner ons hieraan. Ons gee nie omdat ons skuldig voel nie. Ons gee nie omdat ons iets terug verwag nie. Ons gee nie omdat ons MOET nie. Ons gee omdat ons uit genade soveel reeds het. En omdat ons God vertrou dat Hy bly voorsien.
• Hoe lyk gee van geskenke as dit kom by dien vir jou? Watter behoefte dink jy het ander aan die ontvang van geskenke? Hoe voel jy oor die ontvang van geskenke? Watter verskonings gee jy gewoonlik waarom jy nie iemand anders se behoefte aan die ontvang van geskenke wil versorg nie? Waarom is dit moeilik om geskenke te gee? Waarom is dit maklik om jouself uit die gee van geskenke te praat? Deel jou hart met die Here.
• Diens voorstel vandag: Ons gaan na organisasies en mense wat jy weet behoefte het. Is daar ‘n organisasie wat jy weet behoefte het, hulle hulpbronne goed bestuur en vir wie jy nou kan of moet gee? Is daar mense wat nou swaar kry en wie gemoed sal oplig deur ‘n geskenk pakkie met ‘n bederfie in? Is daar ‘n gesin of enkeling wat inkopies nodig het? Is daar iemand wat medisyne benodig?

Gebed:
Here van my lewe,
Help my om U wonderlike geur oral te versprei. Laat my siel oorloop met U Gees en U liefde. Here neem so totaal beheer van my lewe dat al wat mense kan sien is die buitengewone lig wat U skyn deur my. Skyn deur my op so ‘n manier dat elke siel met wie ek in kontak kom U teenwoordigheid sal ervaar. Laat elke mens opkyk na U en net U raaksien. Here, bly asb by my sodat ek kan begin skyn, en deur te skyn, kan ek skyn met ‘n warmte wat die ander wys na U, die ware lig. Here, dit is waarom ek vandag wil dien.
Amen