Woensdag 19 Januarie

Jeremia 31:21, 23 en 25
“21Rig vir jou padwysers op, bring vir jou rigtingborde aan, hou jou oog op die grootpad, op die pad wat jy moet loop. Kom terug, Israel, kom terug na jou stede toe.
23So sê die Here die Almagtige, die God van Israel: Wanneer Ek hulle lot verander, sal hulle weer in Juda en in sy stede sê: Die Here sal jou seën, regmatige woonplek, heilige berg!
25Ek gee nuwe krag aan dié wat moeg is, Ek maak die moedelose weer vol moed.”
‭‭
Om oor te gesels en dink:
Nog ‘n belofte wat Jeremia vir ons opteken wys God se hart vir ons. Hy roep ons terug. Hy roep die volk terug deur te onthou waar hulle vandaan kom. Maak nie saak hoe ver hulle verdwaal of weggedwaal het nie, kom die belofte dat die Here hulle lot sal verander. Hulle sal die Here se seën ervaar.
As jy vandag hierdie verse lees, dink aan hoe hierdie belofte vir jou waar is. Die Here het jou nog elke keer kom haal en jou gebring waar Hy jou wil hê. Ons kan weet dat die Here ons nooit los nie.
Hiermee saam kom die belofte dat die Here self nuwe krag gee vir dié wat moeg is en moed vir die moedeloses gee. Miskien het jy vandag hierdie belofte nodig?
Sê vir die Here wat jou dalk moeg en moedeloos maak. Vertrou Hom daarmee dat Hy vir jou die krag en moed sal gee vir wat vir jou voorlê.

Gebed
Here God, dankie dat U altyd daar is en vir my lief is. Dankie dat U my nooit los nie. Ek kom gee myself weer vir U en kom bid vir krag en moed vir vandag. Amen.

Nog om na te kyk

linkedin facebook pinterest youtube rss twitter instagram facebook-blank rss-blank linkedin-blank pinterest youtube twitter instagram