Woensdag 30 Maart 2022

Stilstaan Oomblikke – Op pad na die Kruis

Teksvers:
29Omdat Judas die beursie gehad het, het party van hulle gedink dat Jesus vir hom sê: “Gaan koop wat ons vir die paasfees nodig het,” of dat hy iets vir die armes moes gaan gee. (Joh 13:29)

Identifiseer:
-Judas is vertrou om die dissipels se beursie te behartig. Mens sou dink dat so ’n belangrike taak moontlik Matteus, die tollenaar, se taak kon wees, omdat hy goed met finansies is. Dit spreek egter van vertroue in Judas se karakter. Dit sê ook iets van Judas se gawes.
-Judas was bo verdenking, tog het hy Jesus verraai. Hoe word mense wat bo verdenking is versoek om foute te maak?

Oriënteer:
-Ek glo nie daar is een gelowige wat die pad byster geraak het, wat dit doelbewus gedoen het nie. Dit gebeur subtiel, soms onwetend en ander kere met goeie intensies.
-Wat is jou swakhede? Waar lê jou versoekings? Watter goeie intensies kan jou tot gevaar lei as jy nie versigtig is nie?

Bely:
-Ons karakter eienskappe waarop ons die trotsste is, lê soms baie naby aan die eienskap wat ons kan laat struikel.

• Deel met jou eggenoot, hartsvriend, mentor of Geloofsmaat wat jou grootste uitdaging of versoeking is. Vra vir hulle om vir jou te bid en jou verantwoordelik te hou daarvoor.

Bid:
Here, help my om op U te vertrou en nie my eie vermoë of karakter nie.
Amen.