Woensdag 7 April

2 Korintiërs 5:16-17 (Die Boodskap)

16 Noudat ek op ’n nuwe manier leef, dink ek ook op ’n nuwe manier oor ander mense en oor Christus. Vroeër, toe ek nog nie ’n Christen was nie, het ek heeltemal verkeerd oor Christus gedink. Toe het ek glad nie in Hom geglo nie. Maar nou dink ek op die regte manier oor Hom. 17 Nou weet ek dat wanneer iemand aan Christus behoort, hy ’n splinternuwe mens is; ’n nuwe skepping in die kleine. Al die ou sondige dinge is dan iets van die verlede. Dan is die nuwe lewe hier!

Die nuwe lewe is hier!

Dink vir ’n oomblik aan iets nuut: ’n nuwe huis, ’n nuwe haarstyl, ’n nuwe foon, ’n nuwe kussing, ’n nuwe stokperdjie… Al hierdie dinge is opwindend. Ons ervaar vreugde wanneer ons met dit werk, ons vertel vir mense daarvan, dit bly konstant in ons gedagtes, want dit is nuut!

Paulus sê dat ons, ek en jy, splinternuwe mense is omdat ons aan Christus behoort. Splinternuut!
Dit is alles natuurlik ook as gevolg van die opstanding. Jesus se kruisdood het beslis versoening tussen ons en God bewerk, maar dit is nie die einde van God se groot verlossingsplan nie.
Nee, nou maak God ons nuut, elke dag, sodat ons meer en meer soos Sy Seun kan lyk, sodat ons meer en meer in die beeld van Christus gevorm word. Ons word elke dag meer en meer wat ons reeds is, en dit is kinders van God. Ons nuwe lewe raak ook nie oud nie, ons word daagliks nuutgemaak.
Dit is waarom die goeie nuus goeie nuus is! Ons is nie so gemaak en so gelaat staan nie. Ons is nuwe mense!

Om oor te dink

• Wat is Jesus besig om in jou te vernuwe?
• Wat moet jy vandag agterlaat, wat deel is van jou ou sondige verlede?
• Wat is jou grootste behoefte vir vandag? Sal jy dit met ons Vader deel?

“A transformed life is the greatest of all miracles. Every time a person is “born again” by repentance of sin and faith in Jesus Christ, the miracle of regeneration is performed.” Billy Graham