Inleiding oor wat die Leefbediening is, wat ons doen, hoe ons dit doen en wanneer alles plaasvind.
LEEF is ‘n beweging wat die sosiale behoeftes in ons direkte en nabye leefwêreld aanspreek.
Behoeftes word op die beginsel van Bate gebaseerde Gemeenskapsontwikkeling aangespreek. Meer bekend in Engels as ABCD (Asset Based Community Development).

Hierdie benadering identifiseer die waarde, vaardighede, raakpunte en potensiaal in ‘n gemeenskap. Dit beklemtoon die balans tussen die aanspreek van behoeftes en die ontwikkeling van menslike bates en natuurlike hulpbronne binne ‘n gemeenskap. Individue, instansies en maatskappye word dan gemobiliseer vir hierdie taak.
Hoe doen ons dit?

Van tyd tot tyd bied LEEF werkswinkels in en om die gemeenskap aan om hierdie bates en hulpbronne te identifiseer, en enige iemand is welkom om hierdie werkswinkels by te woon. Ons het ‘n databasis van die persone wat die werkswinkels bywoon en wanneer daar projekte geloots word, gebruik ons dit om hande en voete aan die projekte te gee.

Projekte kan óf deur LEEF óf deur persone uit die gemeenskap geïnisieer word, en as jy ‘n voorstel het, nooi ons jou om vir meer inligting met ons by leefprojekte@pvr.co.za kontak te maak. Ons hoor graag van jou!
LEEF is ‘n groep entoesiastiese vrywilligers met ‘n roeping, visie en missie om ‘n positiewe verskil in die gemeenskap te maak. Die Uitvoerende Komitee bestaan uit ...
Karel Verhoef
LEEF Leier
Ek is n Pretorianer in murg en been…behalwe vir die 3 jaar wat ek in die Kaap verder studeer het, en teruggetrek het nadat al my hare weggewaai het! Ek het getrou met n plattelandse nooi Jonellda Pienaar, en twee kinders het ontspruit. Deur die jare het ek my in n paar vakgebiede instudeer: Teologie, Sielkunde, Opvoedkunde, Bestuur en Mediakunde...

Lees meer...

As geïntegreerde persoon benader ek die lewe dus nie vanuit n enkele oogpunt nie, maar n diversiteit van denkrigtings. Ek is nie n toeskouer nie…waar ek gaan probeer ek impak maak, dinge verander tot die beter, en om die lewe n beter plek vir my medemens te maak. Resultate is waarop ek fokus, en n doellose rondsit en tydmors tydens vergaderings haat ek soos pes!

Die afgelope 24 jaar is ek baie bedrywig as pa, eggenoot, bestuursposisies by Radiokansel, asook tentmakerleraar by Pierre van Ryneveld Geloofsfamilie. My passie is musiek, hetsy alleen of in n groep. Klavier is my hoofinstrument, maar ek poog hard om viool, kontrabas en n paar ander instrumente op datum te hou. Ek is n groot sosialiseerder en geniet kuiers met familie en vriende geweldig!

Dan is ek ook baie lief daarvoor om te eet! Soetgoed kan ek nie weerstaan nie, en enige iets met kaas oor is n feesmaal! Maar indien jy ons vriendskap wil beïndig, gee my beet, afval of rooiwyn!
Lizel Ferreira (Admin)
Admin
Ek is lief vir die eenvoudige dinge in die lewe; dus ‘n mooi blommetuin, lang ente op die strand stap, hartsvriende en mooi musiek eerder as goud en silwer.

Diere, kinders en oumense het ‘n sagte plekkie in my hart!
Ek is getroud met ‘n wonderlike man en ons het twee pragtige, volwasse kinders op wie ons baie trots is.

Na negentien jaar van onderwyser wees in Natal, geniet ek dit nou baie om saam met LEEF ‘n verskil in ons gemeenskap te maak.
Deon Nel
Uit Namibië se suide
Was my begin geluide
Die rooi kalahari sand
Laat nog my hart warm brand

In Pretoria het ek kom werk & kerk...

Lees meer...

En voor ek weet.. n vrou opgemerk
stap, kamp & fietsry
Is my lekkerkry

Coach & konsulteer met mense
Verbreed elke dag my grense
Dit maak my beursie raas
Geld vir die vrou & kinders om te blaas

My oë is gedurig voor die rekenaar & boeke
Alewig aan die soeke
Vir nuwe waarheid & wysheid
In die mensheid

In God se Gees wat op aarde woon
Probeer ek my eie lewe vertoon
Ek kan elke dag n stukkie verder groei
Hoe meer ek met Hom stoei en Hy Hom met my vermoei.
Amanda Smit
Gebore in die Oos-Kaap; het ek gaan draai in Namibië, Kaapstad, graad gevang op Stellenbosch en opgeëindig in Pretoria waar ek begin werk het. Ook in Pretoria vir Koos ontmoet, 35 jaar getroud en Ma van 2 Kinders (2 bygekry) en die ouma van die pragtigste 4 kleinkinders wat ouma se hart stewig vashou.

Lees meer...

Ek het 'n wonderlike loopbaan as 'n offisier in die vloot gehad en daarna het my paaie gelei na my eie gemeente waar ek in 2006 begin werk het en my passie kon begin uitleef, die plek waarnatoe my Here my gelei het om 'n verskil in mense te lewens te maak.

Ek het ook die voorreg om 'n verhouding met Jesus te hê. Mense en die omgee vir mense, laat my hart warm klop. Mense het almal basiese behoeftes om hulle aan die gang te hou en daarom leef ek die volgende teenoor mense uit : Live Simply! Love generously! Speak kindly! Care deeply!
Johannes Erasmus
Ek is ‘n pa van twee seuns en ons is mal oor die natuur en die see.
Ek hou daarvan om kreatief te wees, buite die boks te dink en goed te bou wat ook die rede is waarom ek my werk baie geniet.

Ek het by LEEF betrokke geraak want ek voel en glo dat dit ons hemelse Vader se wil is dat ons vir mekaar moet lewe en ek dink dat LEEF ‘n groot bydrae kan maak in ons gemeente en gemeenskap in die manier hoe ons mekaar help.
Christa Janse van Rensburg
As die blonde in die span, hoor ek gereeld paar potlood grappies, en ek probeer eintlik ook maar altyd dinge lig hou, alhoewel blonde humor nie vir almal snaaks is nie glo ek mens moet so af en toe vir jouself kan lag! Ek is mal oor uitdagings en nuwe avonture aanpak. My bucket list vir avonture en plekke wat ek wil sien is geskryf vir tot in my derde nageslag... om my eie land te verken is vir my soos Forest Gump se box of chocolates, you never know what you're going to get.

Lees meer...

Gunsteling plekke waar ek al was sluit in Kgalagadi, Kruger, Etosha, Mapungubwe en oorsee Kroasië en Mauritius. Ek is mal oor ons natuurskoon, kamp en kos maak op 'n oop vuur ek spog nie verniet met name soos Johanna Christina nie...
Is ek bang? Ja, vir baie goed maar ek sal nooit so sê nie. Ek is 'n properse Jack(y) of all trades and master of none. Ek het al van mynswigtings gemeet tot 'n kernkrag reaktor help beplan, ek sal doen wat gedoen moet word, al is dit nou gate grawe. Tans, behalwe vir ad hoc jobbies, is ek in my regte werk 'n lewensafrigter.

Ek het een man en twee pragtige dogters met wonderlike talente waarvan een sing is, ek is mal oor musiek, tokkel self bietjie kitaar om 'n vuurtjie vir die wat wil luister. Ek het ook 'n Kalahari self-rescue wat as Pharoah Hound klassifiseer, wat ek vir 4 dae lank uit die Kalahari duine moes lok, ongelooflike persoonlikheid, lang storie vir 'n ander dag se kuier as ons mekaar in die oge kyk en bly-te-kennes deel.

Behalwe vir Jesus is my gunsteling karakter in die Bybel Johannes die Doper, dit moet seker die heuning en sprinkane in die woestyn vibe wees. Ek dink hy was die perfekte voorbeeld van hoe 'n Christen en volgeling van Jesus se gesindheid moet wees. Hy was so nederig toe hy Jesus moes doop, leeg van homself, nie waardig om Jesus te doop nie maar gehoorsaam om tog die wil van God te doen. Vir my die mooiste voorbeeld van leierskap, padmaker deur die woestyn vir Jesus. Jesus was heeltyd sy fokus. Beslis navolgenswaardig! Johannes se egtheid of "authenticity" staan vir my uit en is vir my 'n mooi en belangrike eienskap wat ek graag in ander ook raaksien. Onbekend:" Authenticity requires vulnerability, transparency & integrity."

By LEEF, saam met die span padmakers, sal ek graag ook hierdie roeping van diensbaarheid wil uitleef. Mag ons paaie kruis.

"... If you can't be the poet, be the poem ..." -David Karradine
Alex Flemming
Ek het grootgeword in die Noord-Kaap, Warrenton, en het argitektuur in Bloemfontein studeer, waar ek my vrou Teresa ontmoet het. Ons is al 5 jaar getroud en is al 7 jaar in Pretoria. Ek geniet die natuur, jag, vlieghengel, golf en om te kajak. In al hierdie dinge vind ek rus in God. Ek geniet dit regtig om alle aspekte van ontwerp te ondersoek en om te sien hoe God se hand in alles is...

Lees meer...

Ek geniet my beroep, om ruimtes te skep en te bou om ons wêreld en mense se lewens te verbeter.
Ek hou ook daarvan om met my hande te werk, veral leerwerk. God het soveel seëninge en materiaal aan ons gegee, en as ons dit op die regte manier gebruik, bring dit ons nader aan Hom en eer aan Hom. Ek is so lief vir God drie-enig.

Ek het my lewe op 'n jong ouderdom aan Jesus oorgegee. So lank as wat ek onthou, het ek die Here liefgehad, maar ek het Hom eers die afgelope paar jaar beter leer ken, en gevoel dat ek Hom meer en meer wil dien in alles wat ek doen terwyl ek ander dien en help. Daarom het ek by LEEF aangesluit, want die belangrikste doel van die mens is om God te verheerlik, en om Hom tot in ewigheid te geniet.
Maak asb. ‘n keuse uit een van die opsies in die valvouer of laat ‘n boodskap in die spasie onder “Ander”.
Hierdie is projekte uit die gemeenskap vir die gemeenskap.

Kosprojek

Ons span probeer sover moontlik aan die voedselnood te voorsien deur:
  • nie-bederfbare kospakkies ter waarde van R465 wat ons opmaak.
  • vars produkte geskenkpakke van KOSonline ter waarde van R280, wat jy kan borg.
Op PvR geloofsfamilie se e-nuus kan jy ‘n lys vind van nie-bederfbare kos wat geskenk kan word en ook hoe om ‘n KOSonline geskenkpak te borg. Ons benodig ook altyd plastiek kruisdeniersakkies om die kos in te verpak; dus kan jy help herwin deur jou sakkies aan ons te skenk.

Vir meer inligting, of as jy betrokke wil raak, kontak ons by leefprojekte@pvr.co.za

Klere- en skoeneprojek

Klere- en skoeneskenkings word deur ons span uitgedeel waar daar ‘n behoefte is.
Ons ondersteun ook die Shoes4Souls projek. Hulle ontvang graag skoene van enige grootte en toestand. Vuil skoene word skoongemaak en stukkende skoene word reggemaak.
 
Vir meer inligting, of as jy betrokke wil raak, kontak ons by leefprojekte@pvr.co.za

Ondersteuningshulp aan bejaardes

Ons het ‘n span ywerige versorgers wat kontak hou met bejaardes wat alleen woon. So bly ons op hoogte van hulle behoeftes en maak ons seker hulle is emosioneel en fisies goed versorg.

Vir meer inligting, of as jy betrokke wil raak, kontak ons by leefprojekte@pvr.co.za

Versorgingspan

Hierdie span vrywilligers maak kontak met persone wat ‘n operasie ondergaan het of wat siek is, om te hoor of hulle enige hulp nodig het, veral ook persone wat onder kwarantyn is a.g.v. Covid-19.
 
Vir meer inligting, of as jy betrokke wil raak, kontak ons by leefprojekte@pvr.co.za

Groentetonnels

By die groentetonnels word vars groente verbou. Hierdie groente word vars in kospakkies verpak en ook in ingelegde vorm in nie-bederfbare kospakkies versprei. Vars groente word ook gereeld aan versorgingstehuise geskenk.

Vir meer inligting, of as jy betrokke wil raak, kontak ons by leefprojekte@pvr.co.za

Advertering

Wie kan adverteer?

Die besigheid kan buite Pierre van Ryneveld geleë wees, maar dan moet die adverteerder in PvR woon. Adverteerder kan buite PvR woon, maar dan moet die besigheid in PvR wees.

Dus word die gemeenskap van PvR bedien.

Adverteer

Werksoekers

LEEF wil graag die persone in ons geloofsfamilie wat tussen werke is, help om weer werk te kry deur ‘n databasis van werkgewers en werksoekers, te bou. CV’s en werksaanbiedinge kan aan LEEF admin gestuur word, wat hiervan rekord sal hou en die werkgewers by die werksoekers sal uitbring.

‘n Inligtingsblaadjie van werk wat aangebied word, en werksoekers se vaardighede sal weekliks anoniem in die gemeente se e-nuus gepubliseer word. Werksgeleenthede word op die Facebookblad van Jakob se Put geadverteer, maar werksoekers kan ongelukkig nie hier adverteer nie.

Geskikte CV-template is ook op versoek by LEEF admin beskikbaar.

Vir meer inligting, kontak ons by leefprojekte@pvr.co.za
Indien jy sou belangstel om by LEEF betrokke te raak, hoor ons graag van jou.
Vul asb. jou besonderhede hieronder in
By LEEF glo ons dat geld nie die enigste hulpmiddel is wat aangewend kan word om ‘n verskil te maak nie. Ons maak graag gebruik van kop-, hand- en hart vaardighede om in ons gemeenskap diensbaar te wees.

Ons het ‘n databasis van vrywilligers en hulle vaardighede wat ons gebruik wanneer ons mense vir projekte benodig.

  • Kopvaardigheid: Bv. beplanning, organisasie, kreatiewe denke, logiese redenasie, bestuur ens.
  • Hartvaardigheid: Bv. berading, versorging, empatie ens.
  • Handvaardigheid: Enige vaardigheid wat met jou hande beoefen word.

Indien jy jou naam en vaardigheid by die LEEF databasis wil voeg, kan jy ons gerus kontak by leefprojekte@pvr.co.za

WORD DEEL

PBO REGISTRASIE

930005265
Suid Afrika

linkedin facebook pinterest youtube rss twitter instagram facebook-blank rss-blank linkedin-blank pinterest youtube twitter instagram